ek din ghuma dunga ghadi ki sui ko anti-clockwise aur jaunga vaqt mein vaapas 

aur jameen se uthaakar vo sabhi ghee-chupadi rotiyaan fir se chai mein dubaakar khaunga, 

jinhen mainne maa se aankh bachaakar fenk diya tha.. 

ek din jaunga janavari ki subah mein vaapas jahaan main apani baiting karake bhaag gaya tha 

aur karaunga bache hue ovar us dost ko, 

jo tuition bunk karake khelane aaya tha.. 

ek din chupake se ghus jaunga mammi-paapa vaale kamare mein, 

jahaan din bhar kaam karane ke baad mammi apane hi pair, 

apane haath se daba rahi hogi! 

sorry bolunga aur raat bhar unake pairon ki maalish karoonga! 

aur paapa ke purse mein chori vaale das rupaye vaapas rakhakar 

dekhunga ki usame karz ki kitani noten thi 

jab mere kahane par unhonne mere do-do tuition ki fees di thi! 

apana naya makaan todakar uthaunga vo laal vaali eenten 

aur banaunga vo puraana vaala ghar jisaka aangan kachcha tha 

aur har kamare mein parde the daravaaze nahin. 

us aangan ko khodunga aur nikaal dunga un sabhi cheetiyon ko 

jinhen mainne khel-khel mein raam naam saty gaate huye mitati mein daba diya!

 us chidiya ka ghonsala bhi rakh dunga apane neem par 

jise mainne khud ko arjun samajhate huye eenta maarakar gira diya tha! 

un fute andon ko to nahin rakh sakata 

kyoonki use to cheetiyaan tabhi chat kar gai theen! 

jaoonga aur daadi ke lahasun-mirche vaale haathon ko sunghakar diary mein not kar loonga 

aur duniya ko laakar dikhaunga ki swad ka bhi ek chemical structure ho sakata hai! 

baaba ki chadi ki lambai aur unaki god ki gaharai naapakar 

ek thyoram banaakar siddh karunga ki bhay aur prem ek doosare ke purak hain! 

jaunga wapas school mein aur puchhunga apane teacher se ki 

sardi ki dhoop mein dekhane par jo aankh ke andar resha udata hai 

kya vahee kitaab vaala ameeba hai? 

aur ye puchhunga ki ek se bees tak ke pahaade ratana 

jeevan ki safalata ke samaanupati kyon hai? 

puchhunga ki seenari mein hamesha pahaad bhure hi kyon hain, 

aur hare aur safed banaane par mere numbar kyon kaat liye gaye? 

aur thoda badhakar jaunga assembly mein jahaan 

main aur mere teen dost saja mein murga bane hain 

par phir bhi taango ke neeche se dekhane par 

aasamaan hamaare pairon tale hai..us aasamaan ke saath ek selfie lunga 

aur tag kar dunga waqt ko usamen, use usaki aukaat dikhaane ko.. 

kisi din ghadi ka kaanta pakad kar bahut jor se chhalaang lagaunga 

peechhe ki or aur kalaamandi khaakar girunga 

apane gaanv ki us nahar mein jisame main kudane ki himmat nahin kar paaya tha 

aur nange nahaate har laundo ka jhund mujh par hans raha tha..

aur vaheen kinaare baithe ‘pagale-baaba’ se sununga taalaab vaale budhava-bhoot ki baaki ki kahaani 

jise aadha sunakar main raat bhar so nahin paaya tha.. 

agar ja saka to...